Tur til Mykonos 1982

[sandalar]

1982 drog eg og to venner til Mykonos og var der i 3 veker! Herleg! Vi tok fly til Athen og båt frå Pireus til Mykonos. Då vi kom i land på kaia, var det mange romutleigarar der, og vi vart kapra av ein hyggeleg fyr, Makis. Han køyrde oss i 3-hjulingen sin til Pension Makis, der han også dreiv sin eigen restaurant. Dette var like i nærheiten av St. Stefanos beach. Litt utanfor sentrum. Her fekk vi eit lyst og triveleg rom for 3, med eige bad og balkong. Det var billeg og vi bestemte oss for at her ville vi bu heile ferien. For det meste bada vi ved St.Stefanos-stranda, men vi var også ein tur til nudiststranda Paradise. Vi leigde mopedar og tok oss rundt det meste av øya. Den gongen var det skikkeleg landsbygd og spredt bebyggelse med ein gong ein kom ut av havnebyen. Eg kan hugse ein sjarmerande liten plass som heitte Ano Mera, der det også var eit kloster og nokre få tavernaer. Det som gjorde aller mest inntrykk på meg den gongen, var atmosfæren og livet i havnebyen på kveldstid. Eg veit ikkje korleis det er på Mykonos no, men den gongen var det samlingsplass for homoseksuelle, transverstittar og folk som likte å vise seg fram frå si mest ekstreme side. Den gongen var eg 22 år og hadde aldri sett så mykje rart i mitt liv. Sjølvsagt ein artig opplevelse!! Her var det rom og toleranse for alle typar folk. På dagtid var havnebyen ein koseleg liten labyrint av kvitkalka hus og gater med blomster og butikkar på rekke og rad. Mykonos sit igjen som eit fint og spanande minne. Hadde vore artig å reist tilbake dit no for å sjå korleis øya har utvikla seg.